إهداء إلى أمير الكلمات المبدع الجميل
الاخ الحبيب ا.د /محمود عفيفى دومة
من وحي كلماته للحبيبة
بتحبها ...؟!
..بتحبها ..؟!
طب قول لى ليه ..
وعملت ايه ..علشان تخش قلبها
بتحبها ..؟!
طب فين يا صاحبى..مهرها
مش عايزة توب م الحرير
ولا عايزة عقد الماظ..و لولى
ولا حتى شعر ..
يا ما قالوا لى..
فى عشقها
احلى الكلام ..
بتحبها ..ادي ..انا ..؟!
ده مستحيل ..فى حد يعرف حبها
زيي أنا ..
ده مستحيل. واسأل دروبها و شمسها
أنا اللى من صغري عاشق صبحها
وكتبت جوابات الغرام ..
و انا لسه" نونو" ف حضنها
لما كبرت..عشقتها..
وقالت لى عن سر الغرام .!
قدمت عمري ..عقد لولى
و عملت روحى ..منديل
يجفف دمعها...
يوم العبور..
كان. ظهري جسر
تمشى عليه الدبابات ..
ف" نمرة ستة'
اسأل عليا . في السويس
و اسماعيلية ..و بورسعيد
"أبو عطوة" ..شاهدة
و صورتى فوق الدبابات ..
و دمى يروي أرضها..
بتحبها ..؟!
الحب يا صاحبى ف بلدكم
صار كلام ..حب وهيام
وأغانى ..ونشيد ...مدرسة
في حبها ..انا دبت دمع .
و دبت غربة ..و دبت عمر
عملتوا عقد و إسورة ..
زينت بيه ..ايديها ..
و عمري ما شفتها ..
فى يوم حزينة .
.إلا و مسحت دمعها
دفنت ابنى ف أرضها
وقلت له ..يا زرعة خضرة
اطرح رجال ..
يومها بكيت ..لكن قالت لى
انا حضن امه ..انا حبيبتك
تبكي ليه ..ابنك ف حضنى
بطّل بكا ..!
سكتت دموعى..رجفت ضلوعى
قلت حاضر ..يا حبيبة
يخلف عليا ..ربنا ..
بتحبها ...طب قول لها
مين اللى حبك ..ادي انا
مين اللى مهما يغيب
بيرجع ..يبوس ترابك
ركعتين ..
و يقول لها ..انا جيت يا مصر
انا جيت ..يا حبى
عايزة ايه...قولى اطلبى
شهيد فى أرضك..ابنى انا
فارس فى سينا ..خالى انا
علم قنالك ..عمى انا
احنا إللى نمنا ب الار بي..جي
تحت التراب ..
علشان نصد الدبابات ..
احنا اللى سينا ..
شاهدة علينا ..دم ..وعرق
باقية الرفات ..
بتحبها ..طب قول لها
"النجدي "مين ..
و اسمع كلامها ..و وصفها
ح تقول ..حبيبى
قلبى ..و نصيبى. و قسمتي
العشق يا بنى ..مش كلام
حب وهيام ..
العشق ..دم فى العروق
تنبض معاها فى قلبها
نسمة هوا ..فى صدرها
طب ..قولها ..انا بيتى فين
عنواني..فين
ح تقول لك ..ايه
فى قلبها ...
شكرآ لشلال الشعر ونبع الكلمات الجميلة الذي يلهمنا هذه الكلمات ...الأمير/ محمود دومة
ليست هناك تعليقات:
إرسال تعليق