زجلية تحت عنوان :
شد لْجام ***
شد لجام
لا ترخفو تجي على راسك يا فلان
أو تولي مسخرة
ترجع الفرحة ذابلة كِ النوارة
تدوسك الرجلين وما يبقى شان
ما تشد في لعرش لكارم
على سبة راسو عامر شر ؤب لعرارم
ها لحيالة ولكذوب وها حلاوة لسان
شد لجام
لي لاحك لوحو
نسى كذوبو راه رخًص روحو
كون انت وقاد لميزان
فالفول قالو ناس زمان
تيتعطى غ ل ما عندو سنان
ؤ ل يستاهل تمسح ؤ ما بان
التشلهيب ؤجوج وجوه ...
تبيخة وزيد فَيْخرات هي النيشان
في ولادك عندك تهمل وتفرط
يدور لوقت عليك ول فرط يكرط
تضيع ايامك ؤتخلط عليك لْوان
بل عض على دينك وعلى الهدى ربيهم
علمهم ك يهدروا وبالكلمة الطيبة داويهم
غربل السوقية ولغا الخاوي واللسان
ؤ بالواضح والبيان
ما تدير تيقة
يتقلبو عليك وتعرك تعريكة
بل ينتفو ليك ما بقى وتعود بهلوان
فشد لجام
كون بنادم فالإبرة يتبعها لخيط
في الرجلة كون سبع لا حيط
ما تولد ؤ تطلق ترجع حياتك مارستان
فزمان واش من زمان
لمراة ظالمة وتقول مظلومة
بغات لحرية ؤ ما عاد عيب ولا حشومة
لغدر بالعلالي والنصف عريان
حيت رخيتي لجام
انت وانت وانت ...
فادفع يا لغافل الثمان
شحال هذي قال لقمان
قد ما اهتمتي بالخلق يهملوك
ؤ ل درتي لخير يثقلوا عليك ويدكوك
طرق لمسمار ؤ زير لجام
لْعَود بلا لجام تزعريطة وطيحة
هرسة وفقسة عار وزديحة
ؤ ل بغى يلعب لا تكون لو تيران
خليه في بعادو يذوق لمرارة
ما قنع ما شكر نسى الدنيا دوارة
شحال من قلب تهرس باش طلق لجام
زمان الغفلة وحلف الشيطان
فيه بنادم عاد ذيب وحرباء ب سنان
كيت مول لوفا والمعقول
مول الضمير النقي ما صبح مقبول
بات الخش الشريف وقضيب الخزران
شد لجام
ؤ ل شتيه راكب على لكلخة...
قولو مبروك العود يافلان
الشاعر والزجال : أحمد الكندودي *** المغرب*****
ليست هناك تعليقات:
إرسال تعليق