شد بْلاك
ديرو غطاية ...
كحل وسواك
عامر بهوت
حاقد ؤفات فيك لفوت
جوج وجوه افاك
شد بْلاك
ما بيني ؤ بينك فتيلة
واش الفيل قد نميلة
شد المسافة ؤبعد عفاك
ؤ زمان قالوا
لا تعاند لعديم في قوالو
محي لمرايا..
ؤ دخل جواك
عنداك تحرقك ناري
قد خيري قد عاري
ما انت قياسي...
ؤ ما انا غطاك
ذاك لخير قاد بيه ساسك
ؤ ذاك االطنيز راه سوس ضراسك
واش نسيتي لفقيه ل قراك
ياك ما علمك غ الطيبة
جفلتي ؤشدتي لارمود من لقزيبة
رد البال للركلة...
واياك اياك
الناس قطعت لواد
بنات لمحبة صفا ولوداد
تجاوزت الدونية...
وانت باقي في بلاصتك بَرًاك
غرقتي ف لوهم والقبح
نبشتي بشرك لقلب والجرح
فحسب خمسة ؤ تكمش...
بل شد بْلاك
لعقلية بالزطاطا سايلة
خاصها ترتق فعلى لكلخة مايلة
لعب مع قرينك ...
فهو قياسك وواتاك
عنداك تدير لعصا في الرويضة
تولي عيان ل في كرشو حميضة
او غي غادي داهس...
ؤ ما شفتي حافة والبغض عماك
الرجلة خير ومحبة
من الشمايت خطيها وزراع الجربة
حنا ما زرعنا غ لخير...
ودربك شر.. فشد ما جاك
لا تمثل دور سي الزوين الطيب
راك مراوغ فسول لمجرب
ؤ باش ترتاح وتريح...
طرًق بابك عفاك
بل شد بْلاك
لهدارة ف مدينة لملح داعوا
ها النمامة ها العطارة وللود باعوا
تصب يا لمش تصب ...
فهي النشبة شداك شداك
شد بْلاك
تعلم تزرع الخير والسماحة
يبان عليك السر وتحس الراحة
راك عايش مخطوف ...
ؤ بين لقوالة غطستي والحال جلاك
شد بلاك
*** الشاعر والزجال: أحمد الكندودي *** المغرب **
ليست هناك تعليقات:
إرسال تعليق