زجلية تحت عنوان:
***جامي تعود بنادم
صعيب عليك تولي بنادم
حنين راقي فاهم
حيت رضعوك البغض
وبالنكد لقحوك فعدتي فظ
او قل ثعلب ولف لحيالة ...
وعلى الصفا صايم
صعيب تعود بنادم
ؤبين عطر الريحان شام غانم
النقص ؤ ما يدير
ديما حاس هزيل صغير
حاير في خطواتك...
واش ب ليمن تبدا ...
او بالعسرية راك زاطم
فسير
رفاقتك نار الكير
بل قاسي ظالم
لمحبة والخير ماشي تطبع
ولا نفاق وانت رخيص مضعضع
حال فمو ؤساد ودنيه...
وعلى العيب عازم
لخير ما يغلبو شر فتهنا
واخا تعود حنش ؤ تعيى ما تتلوى
في اولو يطيح الضيم ...
وباش يطوال تقلب عليك روادم
ففيق وتعلم تركب لوفا وسفينتو
باش تنجا من تابعة لغد وروينتو
يمهل ولا يهمل وتعود نادم
مول الحرف والكتبة يا حسرة
ساعة جحا زمانو في دواخلو شاعلة جمرة
حقود هبيل واهم
اهل لكلام بالمعنى يداويو النفوس
يمسحو بدفا لقصيد حر القلب والشموس
يرتقو ما يفرقوا فاهم يا لايم
جامي تولي بنادم
حيت في المستنقع غاطس عايم
جينة غريبة محمومة
لا ماضي لا حاضر النفخة معدومة
تربية الغابة ...
ولعقل مغيم في مكرو هايم
فسبحان من خلق فسوى
قاد الصورة ؤ على عبدو ما قسا
ففين العفة والسماحة يا لحلاقم
جامي تعود بنادم
حظي من الجايحة وعفطاتك المايلة
سير على هواك والله ما تدير الطايلة
بيني وبينك مسافة...
وفي التوش يتلاح مول الشر ب لعرارم
جامي تعود بنادم
*** الشاعر والزجال: أحمد الكندودي *** المغرب ***
ليست هناك تعليقات:
إرسال تعليق