خدعني وباع وساب قلبي
يعيش أوجاع يانا يا غُـلبي
ندهني وسيـبت أحلامي
أعيشها معاه وأيامي
تضيع ويّــاه وأنا راضي
لقيتها تعدي ع الفاضي
ولمّــا صحيت من أوهامي
لقيت نفسي خسرت كتير
مشيت ياما كتير مشاوير
رميت قلبي في حضن يخون
وخلاني كما المجنون
في وسط السكة ورماني
وباعني رخيص ولا جاني
بقلبه في يوم يواسي عيون
خلاص هبعد وأنا ندمان
على حُـبي لعاشق خان
هسيـبه زي ما سابني
غرامه في قلبي دوّبني
لازم يندم على حبي
ولا يلاقي حنان قلبي
ولا هارضى يعاتبني
عتابه لقلبي ده مرفوض
ولا هاسمح في ليلة يعود
رضيت بالغدر وعذابه
هاعيش وحدي على بابه
ولا عمري هافكّر فيه
مع إني بحن إليه
لكن قلبي خلاص سابه
هاعيش وحدي مع حبي
هاداوي اكيد عذاب قلبي
وهانسى كـلّ خاين باع
واعيش عمري بدون أوجاع
أنا وحبي سوا عايشين
ولا نبكي على خاينين
خلاص راحوا وزمانهم ضاع
كلمات الشاعر الغنائي / محمد مصطفي
ليست هناك تعليقات:
إرسال تعليق