مشاوير!!! ١٧٧
وبنيت مدينه م الاحلام
وقولت اخططها.
ازينها. وارسمها.
الون السما بنجوم. تنورها تنقطها
واسند بالعمار ضلي. وانادي يامدينه حلي
لضفاير . طول شارع رمسيس
وفرقي لبسمة
ليا فيها قسمة
أنا وكام واد تسعد لالف هاميس
يتشق ليلك شق ويلون الطوبه
يتلون المأمون وعباس مع عروبه...
وتلبسي توبك وتعدلي السكه
اوصل لجدي رويعي مستني ع الدكه
واللاسه كشميري ملكي ومش ميري
وطاقيه قطنيه .والناحيه باطنيه
والنفس تؤمر أمر ماتيلا نشرب تمر
مولد وسيرك وزمر طولت ف سجودي
عودي خفيف ونحيف مدي ع قرودي
الظهر ف الحسين والعصر ف نفيسه
حام الحمام واهوطار هاجر لتقفيصه
والحلم قسمناه بيني وبين عيسي
وحضنا كل الود ماسك بيده القي
من بعد جامع عمر لكنيسه ومعلقه
.وخطاواي سرقانا للسيده عيشه
يابنت سيد الخلق. ياستنا زينب
رايح لباب الخلق والخلق ف الملكوت
ودنيا مشينها حيلتنا فيها الصوت
ومدينتي جوايا. واسمها منحوت
علي راسي وحوايا خضر لشجر التوت
ف ولدي ف بنتي. ياسمره يا انت
ف كام حاره وزقاق. ووسعايه وسط بيوت
وعم ابراهيم بالعصا. والرقص بالنبوت.
واللفه كعابي .ف المشي انا موروط
ريحت علي رصيفك وامني كان سيفك
وعملت انا ضيفك وفيك بتأمل
هاقعد هنا خمسه والجرعه كام لمسه
وبكره راح اكمل
ليست هناك تعليقات:
إرسال تعليق