عاش القِنَاَع
بقلمي محمد عنانى
وصبحنا بنداري الوشوش
بألوان كتيره مع الرتوش
وقليل قوي ما بيخدعوش
والأصل ضاع
بين اللي خاين و اللي باع
وكتير ما بينا ما نعرفوش
واللي إختفا ومالقينهوش
وفنون خداع
ياما ومفيش عنها إمتناع
والحق راح ماشوفناهوش
بين كدب ويا كتير نقوش
وزاد الصراع
بين الأسود وبين الضباع
وكلاب وغيره من وحوش
فينها الحقيقه ما بيقولوش
والزيف دا شاع
أصبح حقيقه على المَشاع
والصدق تاه باعوه بقروش
وصوته حتى مانسمعوش
ومات الجياع
من الألام و لا فيش سماع
حتى اللي سمعوا ما ينطقوش
ولا فيه شجاع قادر يحوش
وعاش القناع
وبسببه مات شُرفا وسباع
واللي إختفا وبدون نعوش
وصحابه بينا ما يخلصوش
بقلمي محمد عنانى
ليست هناك تعليقات:
إرسال تعليق