انتخبونى
..............
يااهل الدايره يااهل الحى
انتخبونى وتاخدوا ثواب
انا خدمكوا رايح جاي
صرفت كتير وباكح تراب
جبت الزيت والسكر جي
..
إحنا جيران الباب ف الباب
جيره وطيبه مالهاش زى
وياما لعبنا كوره شراب
حاخد منكوا وزير الري
وكل مواطن نص كباب
ياكشى تاخدو حباب اعني
والمفطوم يشرب عناب
وف كل ميدان حنفية شايي
يااهل الدايره يااهل الحى
انا خدمكوا ليل ونهار
الاكل الصحى نى ف نى
بالنسبلكوا انا احلى خيار
ويبعد عنكوا يارب السو
من امتى بنعرف نختار
الاسعار بكره هتحلو
واهو فشار غير الفشار
ونطريلكوا الدنيا شوي
طرقع بمب وولع نار
حاسس إنى مقاول انفار
ويا السيستم رايح جاي
عندى شوال مليان افكار
هرفع ايدي لكل قرار
بس يوافقوا ياخلق عليي
اه لو نكسب أول جوله
انتو الاهل انتو الاحباب
انا واد جن وفاهم الفوله
كل كلامهم صح صواب
ونطبل م الدوره الاولى
ونسئف زى النواب
ونوافق بالايد الشوله
ونعارض أى استجواب
واعمل زى مايملو عليي
بس يقولو النايب رايح
بس يقولو النايب جي
وموافق ويا التيار
نرفع حبه فى الاسعار
فى المصلحه هنصب شوي
عايز الشمس اعرضها إيجار
ونفسى نخفف منها الضي
وضريبه لحشو الممبار
انا خدامكو ياضى عنيي
الصبر ياخلق الصبر شوي
يااهل الدايره يااهل الحي
انتخبونى وتاخدوا ثواب
وحياة ناديه وشاديه ومي
عليا النعمه انا مش كداب
يعنى ماجتش ياخلق علي
ولا فارقه معاكو الاسباب
ومافيش شيشه من غير لي
يااهل الدايره يااهل الحي
فات المر الاسوء جي
محمد وحيد
ليست هناك تعليقات:
إرسال تعليق