قلم رصاص واستيكه!!! ١٥٤
قلم رصاص. واستيكه
جدال بينهم. مين النافع
ومين ليه النجاح شافع
بيتشكي. القلم منها
وينفي التهمه ويدافع
لاعن لوجودها وسنينها
و يتحكي كتير عنها
كفايه ال اكتبه تمحيه
واكتب وللحروف تمسح
و جرحي انساه. تيجي تصحيه
خلص قولي.
ومش عارف فعلها اعديه
وايه قولك يااستيكه!.
صحيح دي كل افعالك !!!
بصراحه ومااقوالك!!!
قولي ورديه!
انا حاضر هاقول حاضر
ده مش طبعي هوا غادر
انا ماشيه وراه اصلح.
وهو لفهمي مش قادر
صحيح يكتب كلام طيب.
وليه صاحيه وماتغيب
وساعه حرفه ما يعيب
اسيبه ولا ليه امحيه !!!
ضميري انا مايخلصني.
اشوفه غلطه وعليه اثني ...
ازاي يبقي ف السطور غلطه
وشايفه حرفه حروسني ...وانا اسكت!!!
بروح اجري وروح شاطبه
بدون تجريح ولا معاتبه
ياريت اقدر. اكون كاتبه
و لاعمري اقول غلطان
ولا احكي واكون سوبه
وفيه بينا حنان وامان
وناسي ان عمرنا بيقصر
وانا صغرت وهو كمان
من يوم ما خرجت من ربعي
صبح. حالي يدوب. ربعي
وهو يدوب باين سنه
ولا بعاير ولا طبعي
لكن هو ال متناسي.
شبابنا واحنا ف العشرين
وراكبه شيطانه مع جنه
ودي رواية وليها ناشرين
مفيش شكرا يريحني
وليه لمجهودي يمسحني
وينكرني ويدبحني
بطيب خاطر انا مسامحاه
صحيح أني يوم ما كتبت
لكن. دوري أنا الممحاه
ياريته. يحن يلمحني
ويحس مجهودي ع السطر
بقي عودي خلاص محني
وانا مسامحاه
وطالبه منه يسامحني
ليست هناك تعليقات:
إرسال تعليق