عكازي!!! ١٥٣
قالب لحرف اللام وعليه وبتعكز
والصفحه صابها الوهن وجبينها متسطر
احلب لوحي الحرف. يقولي طب غمض
تاني ماتتلمض و يعصي مايقطر
غاضب وقافل كفه ويفتحه فاضي
وجفف القنايات لا بيروي ولا فطر
للصفحه اعطر.. وادعي يامسهل
وامسك شواشي القلم. بشويش وبتمهل
وادفي لمسه بكفي واصلي وادعيله
ينفخ ف صورته. يعيش و يتأهل
وقوله شد الحيل. وريني كده خطك
مين ال حطك. ف سكتي ياحزين
ما كنت ساكت وناكت. ماشغلاني الموازين
اخرك ف جيبي. ع الصدر بس تزين
ولاكنت تشقي. ولا همك قنايا وبحور
كاتم لحسك. وكافي الف ماجور
همس كاتبلي. سندال اهو ف ضهرك
وابقي رمحك وسهمك. وف الجد اكون مهرك
قولي ف جوفي. وخوفي متقنن
وان كنت افنن. اهنن نفسي وانا ماشي
ادندن لثومه ونجاه. وقول مايجراشي
اهو اي حاجه. تصبر البعرور
جبته لنفسك وعيش. ياتعيس الحظ
راحت سنانك. وقت ماشح الرز
قالب لحرف اللام. وعليه بتتعكز
وكام اهات وشات. وبوست وتنكز
والحرف مش ابنك. ويدوب ليه بتشاور
وخط يدك. فارق سيطر عليه جبنك
تاهت حروفك. وماعدت بتركز
أسلك بقي. واسترني ياصاحبي
بان ف الشدايد . واصلب بقي حيلك
لحسن يا ويلك. مني لو هيست
اجري التراك. واعمل لنفسك تيست
والعب رياضه. وشوش وحايل الرست
ولا انقوست. وعايزني انا اشيلك
انا ابن اصل وشاري. ومفيش تاني بديلك
واخد بيدك. بس انت سندني
بس تواعدني. تساعدني ...ونبقي!
طول الطريق اصحاب
ليست هناك تعليقات:
إرسال تعليق