اجيب منين!!! ١١٦
ومين بايع يومين حلوين
وفين الاقي.ومكانهم فين!!!
وياريت لو حلوهم طازه
يكونوا فرش مش بايتين
وفاض منه وملوش عازه
قولولي مين!!!
يجيبلي ساعات فيها عيشنا
ولقمه. هنيه من عيشنا
وعسل ابيض وماغششنا
وناس واضحه بتوحشنا
مريحه مش جوره وكمين
قولولي مين!!!
اجيب منه السماح جمله
اجيب دسته شموع كامله
عشان تبقي النوايا صافيه
لبني آدم. ومش نمله
يكون. صادق نقوله آمين
قولولي مين!!!
اجيب منه كيسين فرحه
وبسمه وقسمه مع طرحه
وقاعده. برحه وشرحه
مفيش فيها لريح جارحه
وملايكه. لو بني آدمين
قولولي مين!!!
اجيب منه. الأمل كراتين
وأصل ابيض عفي ومتين
وقلوب بتغزي الف وتين
بتروي. كل شوق بحنين
لقولت اه يصيبها انين
قولولي مين!!!
يبيع بيعه سعاده شروه
لناس . ف الحياه ثروه
وطول العمر مش عروه
ف وشك. زي ف الخلوه
معاك ف فرح ولاحزين
قولولي مين!!!
يكون شايل يومين. للود
ف ضهري لو ف ساعه.للجد
وسند. وفي الشدايد ..سد
ولجلي الجبل ينهد
وصديق يبقي عون ومعين
قولولي مين !!!
وفين السوق!!!
ف حلايب .ولا حتي دسوق
اروح اجري . وقول محقوق
واتكفي. . وغالبني الشوق
الحقني. قبل. مني يسوء
وده سؤالي.ومعاه كام سين
قولولي مين!!!
ليست هناك تعليقات:
إرسال تعليق