(..السربون..)٢٦٧
وامي خريجه السوربون
زي امك
ولو شربت الشاي ب ليمون
زي امك
تتوه مني.و.بعيد عنك!!
لا فكت خط ولا بتاع
وكانت ذكيه بالفطرة
ولو حطط ع الشاي نعناع
نخش ف مرحله خطره
ودي امي ودي امك
حكمه تعيش معاك ذكري
ولو دبحت الخميس فرخه
تكون هيصه وهليله
وتصبيره نصيبي رجل
كنت اطير من الفرحه
وغنيمه تساوي عجل
و حاجه عاليه القيمه
وانا فاكر ان ده لوحدي
و حصري بس لحالاتي
لكن الحكمه من امي
انه لكل اخواتي
لواحد من ورا التاني
ولا تفرق في يوم بينا
وكات فرحه ماسيعاني
كانت بركه ف طبق واحد
لكام واحد مع التاني
وست بيت وحريفه
وقرش ابويا ف مكانه
وكان للحمه تشريفه
حافظها البيت وسكانه
ولو تديني تعريفه
شبيك لبيك
بقيت الجن انا طوعها
وكنت ليها انا ولدها
وكنت حافظها معاهدها
و لما البصل يدمعها
ويزيد آلامها واوجعها
ووقفتها بتوجعها
اروح واجري وقعدها
وجيب الميه اسقيها
وادعي لربي يشفيها
كانت دنيا بكام دنيا
وكنت اقرب ولد ليها
وديما كنت انا في باطها
مهاودها ومراضيها
ومقضي لكل طلباتها
وتدعيلي وروح يابني
الهي اشوفك ويديلك
ويعلا مقامك وليه تبني
هاتكسب يابني بدعيلك
الميه من يدك تطببني
و كنت اعملها حاوي
لجل الضحكه في عنيها
تقولي يواد كفايه واسكت
تلاقي البوسه ل اديها
امي كانت حاجات تانيه
كانت شخطه وليها رنه
كانت حضن وكانت جنه
كانت ..دنيا غير الدنيا
كانت طيبه وليها هيبه
كانت صاحبه مع حبيبه
خميره للطيبه ولاغير
كانت جامعه.وجامع. ودير
راحت. هي وراح الخير
ياريت ترجع ولو ثانيه
وراح الطعم وبهت اللون
مع امي
..........خريجه السربون
ليست هناك تعليقات:
إرسال تعليق