حنيت لزمان
ــــــــــــــــــــ
عديت إزاى ياعُمرى
وديت فين السنين
حنيت لزمان ياعُمرى
وبدوب لهفه وحنين
حنيت لــ ايام طفولتى
لحياه كانت بطولتى
ياريت ياطفولتى طولتى
وفْضِلنا صغيرين
حنيت لــ ايام صبايا
ضحكى ولعبى وغُنايا
ونجوم الليل معايا
وصحابى المُخلصين
حنيت لـــ اجمل ليالى
كان فيها القلب خالى
إن توهت ألاقى حالى
فى عيون الطيبين
مُشتاق قلبى لشبابُه
لحبايب عَنُّه غابوا
حتى لــ أيام عذابُه
فى دروب العاشقين
نفسى ارجع بـــ الزمان
لــِ سنين بتفيض حنان
وحروف الدار أمان
مكتوبَه على الجبين
سامى النويهى
ليست هناك تعليقات:
إرسال تعليق