راح العيد
ـــــــــــــــــ
كنت بحب زمان العيد
كنت بقابلُه بلبس جديد
كنت بحس معاه م الفرحه
إن محدش قدى سعيد
يمكن علشان كنت صغير
واما كبرت الحال اتغير
عُمر الفَرْح فـــ قلبى قُصير
وان جِه يبقى ملوش مواعيد
كان فى الماضى العيد له معنى
كان لو بينا فُراق يِجْمَعْنا
كان فيه بيت وان ضاق بيساعنا
فيه نتلم قريب وبعيد
كان لى حبايب عِشت فـــ خيرهُم
غابوا ولسه القلب فاكرهُم
واما بيجى العيد من غيرهُم
يِتْعَبْ قلبى وحُزنُه يزيد
اللى بتحلى الدنيا معاهُم
راحوا وراح العيد وياهُم
وساعات بنسى وبستناهُم
لما يهل هلال العيد
سامى النويهى
ليست هناك تعليقات:
إرسال تعليق