زجلية تحت عنوان:
كلشي غلا ***
كلشي غلا
الا لمحبة لِ رْخاصت
عادت عيب وغلتها ساحت
بات لكذوب والنفاق سلعة
لمروة جذورها بارت
لكسادي والهيئة والروح نتانت
بنادم باع خوه بالرخا ...
سقاه مرارة جرعة جرعة
كلشي غلا
الا لخاوة لِ رخاصت
ذيك العطفة كرمت ؤ بالمكر فاحت
ما بقات تنفع بزولة ولا حليب غبرة
وخا قالوا لخاوة حدها الدنيا زادوا في عماهم
زرعوا لحقد في صْغار واللحظ جلاهم
الظلام غطى لقلوب ؤ طفات الشمعة
الصلة والرحم ولات خارج الموضة
بنادم صبح مرهط ما تجمعو غ الروضة
ما يبكيك...
لكن يتفكر غدا نوبتو والرجعة
كلشي غلا...
عدا الوفاء والإخلاص
بنادم قساح دواخلو كياص
تحراميات واللعبة في الجعبة
لغدر عاد مرض في لقوم ساري
لخديعة والشر كلشي بايع ؤ شاري
ضرب لحديد ما حدو سخون...
ودفع خوك في الحافة دفعة
كلشي غلا
الا التيقار والاحترام
بات القبح على طرف لسان جذام
الكلمة الطيبة خماجت ردها لقبح بدعة
الصحبة والرفقة فقدت لونها يا فلان
لا صدق لا صفا لا ترتلان
سومتها شحال ف الجيب لا ضمير لا وعى
الوسواس والتخلويض والزور ساسها
المصلحة ؤباك صاحبي راسها
ضاع لخير في الزحمة والترعة
كلشي غلا
إلا الانسان
رخاص ما عاد يسوى ثمان
نقشوه بِ جْهالة ولبهوت ...
عاد سوقو خاوي تسلية ومتعة
فآش هاذ الزمان لمنونخ ...
وآش هاذ الغابة لمصدعة
كلشي غلا
الا الخوف من الله
على الريال لغافل باع مو وباه
فآش من تمدن هذا...
وآش هاذ الهمجية لعادت صنعة...؟
كلشي غلا...
*** الشاعر والزجال: احمد الكندودي *** المغرب ***
ليست هناك تعليقات:
إرسال تعليق