شمندي!!! ٤٩
ياشمندي يابن عمي
لسه صورتك بالسلاح
وانت بتقول الله اكبر
حي حي ع الفلاح
وانت بتقطف الفجر عنوه
وتجبره يجي الصباح
تروي الصحراء بعرقك
تخضر تطرح سنابل
ترجع للعدو تحشه
تنزل فوق رأسه قنابل
كان صدرك مليان بصبرك
مايهيب لموت لو مقابل
كات قلوبنا هناك تبارك
وكات عنايه الله تشارك
وانت بتقول الله اكبر
وانت ذكر الله ماتارك
لسه صورتك ف الخيال
مهما بتعدي السنين
شايل وع كتفك سلاحك
تقبل الارض بحنين
والقدم ف الرمل غارز
فارس وبسيفك مبارز
نصر كان بيهل بارز
واحنا بندعي وآمين
ربنا ياخد بيدك
ربنا يرفع راياتك
كنا بنصلي وربك
هو عالم ايه غاياتك
وربنا حقق لحلمك
نصر من عندالله مبين
زحت غمه نصرت امه
وحش طالع م العرين
ياشمندي يابن عمي
حالا وكأني شايفك
وانت رافع للعلم
والعدو مرعوب وخايفك
وفر هارب الشيطان
ياشمندي يابن عمي
لسه صورتك ع الحيطان
تسعد النظر اليها
تخضر لكل الغيطان
كنت زينه الشباب وزينهم
وكنت اقول يارتني بينهم
همه ف وسط الهمم
بس كنت صغير ولسه
وانت قمه فوق قمم
وانت تسطر الف قصه
كنت بتعلم امم
اوعي تفتكر ان ناسي
وانت بتعدي القنا
كنت واعي وكنت راسي
انك بضحي بروحك
وبتشتري روحي انا
وانت صايم ع كل زاد
وانت بتصون البلاد
وانت هادد لكل ساتر
كنت سيف مقدام وباتر
انت واخواتك الشداد
عبد العاطي ومعاه محمد
وبطرس بيشد جاد
والتمريض كان لناديه
والدكتوره كانت وداد
مصر كات بتدعي ليكم
كله واحد مفيش بعاد
كنت نعمه رجالها.. انت و
كنت و.. والله.. زينه الولاد
و الفرحه عمت كل دار
والانكسار صبح انتصار
وكنت بطل...فارس وجندي
مصري...بجد
...............ياشمندي!!!
بقلمي/محمود عفيفي دومه
ليست هناك تعليقات:
إرسال تعليق