الفانوس السحري .. !!
طلعلى عفريت
الفانوس ..
مره دعكته
قاللى شبيك لبيك
قلت خلاص
الذل انا ودعته
ويا عفريت
بالطلبات هاهريك
قال : هـــأو
دا أنا عفريت
مارد م الجان
مايهمنيش
مكان و لا زمان
واطلب و وأنا
عندى البرهان
طلباتك أوامر
اخليك سلطان
قلتله .. انا
راجل غلبان
عاوز قمح
انتاج مصر
ومسؤولين ..
يبطلوا فشر
وحكومة ..
م تموتناش
من القهر
ومرتب يكفى
لآخر الشهر
وعاوز عيش
بدون طوابير
وإنفاق حكومى
بدون تبذير
وانتخابات من
غير تزوير
وغفير في بلدنا
يتعامل زي وزير
ونفسي الاقي
من غير طوابير
شيكارة رز
ومعاها دقيق
وسبب مقنع
لأى حريق
ومجلس شعب
بدون تصفيق
وفى كأس العالم
يكون لينا فريق
واعيش يوم
من غير خوازيق
نفسي اروح
شرم الشيخ
وصابعين كفتة
فى السيخ
واشرب مرة
عصير بطيخ
واخرج من القسم
بدون تلطيخ
نفسى الضحكة
ترجع تانى
وحتة لحمة
ادوقها بسناني
كندوز او ضانى
وجنيه مصرى
موش برانى
ورصيف للمشى
انا وخلاّنى
رد العفريت
بزعل و بندم
وقال يامصرى
ماكنش العشم
بص .. انا ممكن
انقل لك الهرم
واسد لك
طبقة الاوزون
اللى اتخرم
واخليلك البقره
تمأمأ زى الغنم
وابنيلك قصر
من العدم
واقولك معنى
شرم برم
بس طلباتك دي
طلبات ملموس
عقله خلاص
اتلحس ..
أكله السوس
ده تخطيط
ياابنى ومدروس
انك تعيش
على طول موكوس
دا احنا بناخد
منكو دروس
ازاى نخلى الجن
علطول متعوس
وياريت ترجعنى
تانى الفانوس
وزى بعضه
أعيش محبوس
بدل ما اخرج
اتبهدل زيك
ويتلم موكوس
على متعوس
شعر : أحمد المرشدي
ليست هناك تعليقات:
إرسال تعليق