زجلية تحت عنوان:
ولاد الدونية***
لا تقارن...
راسك بيا
انا السبع
ؤ انت غ حدية
من ايت با عمران رضعنا الرجلة
الوطن عندنا غالي ؤ هو الغلة
بالدم ضوات والهمة والحرية
بل رفرف علام لبلاد
دسنا بالنضال الخش ولعواد
الخونة ولعملاء والقوم لمعمية
ذوك لقشاوش ديال عاشورا
ل تباعوا بالرخا ؤ دنسوا الصورة
سبعة رهطين ل ولفوا الدونية
لا تقارن راس بيا
الحق خذيتوه ؤ خوصصتوه
بغيتوا تحكمونا والشان فقدتوه
حفر حفر اش هاذ الهمجية
لعملاء دسروا وهما والو
شراهم الغرب باش يبقى داكَ وتادو
نساو غيرة لجداد والتضحية
في الريف عبد لكريم طوع أسبليون
ؤ في الصحراء ايت لحسن وبن حسون
ما خانوا العهد وخا الترهيب والكيدية
اما في الاطلس موحا فرشح لفرنسيس
اختاروا الحرية ؤ رفضوا الذل والغيس
نهاب خيرات بلادي والمجانية
ؤ وخا العافية ولدات رماد
بانوا كلاب لكرنة ولغدايد
استقواو بالروم ...
عاونوا اهل المنكر ؤ ربطوا يديا
حبوا يوليو علينا سبوعة
خونة وعملاء وهما ضبوعة
سرهم الشوك غطا وطعمية
فلا تقارن نفسك بيا
مغربي يموت على بلادو
م يحركوه فساد ل ف الارض داعوا
قلوب النحاس والدونية
فنوض غير على بلادك
لعدو يبقى عدو فخوذ بالك
وخا بالنقرة ولماس يحني ليا
فلا تقارن راسك بيا
*** الزجال والشاعر: احمد الكندودي ***المغرب ***
ليست هناك تعليقات:
إرسال تعليق