كتبت هذه القصيدة فى أواخر التسعينات من القرن الماضى ونشرت فى مجلة الهدف الكويتية العدد رقم ١٦٤٥ بتاريخ ٢٠٠٠/٢/٥
إلى روح عمنا بيرم التونسى
أعذرنى....ياعمنا
ياتاج راسنا كلنا
أنا حاكتب بس ويادوبك
وحاأقلد..... بس أسلوبك
وأخد فتلة...... من توبك
الأوله آه..والتانية آه..والتالتة آه
الأوله آه........وسمعناك
والتانية آه...... وحبناك
والتالتة آه وقلنا معاك
الأوله آه..وسمعناك وكلامك ياعمنا عجبنا
والتانية.. آه وحبناك عشان كنت من توبنا
والتالتة..آه وقلنا معاك وسكنت فى قلوبنا
فاكرينك..ياعمنا..فاكرين كلامك
فاكرين بعادك.......فاكرين الآمك
فاكرين كلامك..اللى عبر عن كل شئ فينا
فاكرين بعادك اللى بكا قلوبنا قبل عنينا
فاكرين الآمك فى الغربة اللى كان كاوينا
لكن..لما رجعت وحضنت أرضك..وحضنت طينك
طلعت كل اللى عندك واللى ف عرينك
ومن بعدك ماشفنا تانى مبدعين
دابس من قلة حيلتنا
بنقول على روحنا شعرا وزجالين
ياعمنا...ياتاج راسنا كلنا
تشهد عليك إسكندرية والسيالة
يشهد عليك حى السيده
تشهد عليك كلمتك....... والمقالة
وأم كلثوم فى الحب كده
شوقى..طه والعقاد كلهم شهدولك
ودرويش.. ومن بعده الكل غنولك
وفاكر................فاكر ياعمنا قولك
لأهل المغنى...دماغنا وجعنا
دقيقة...سكوت لله
قبل فراقك بكام سنة
أهو جه اليوم ياعمنا
اللى إنجرح فيه الغنا
والكلمة لفوها ف كفن
والفن من بعدك يابيرم
فى الأرض..... إندفن
محمد نبيل محمود
ليست هناك تعليقات:
إرسال تعليق