بعضشي!!! ٢٨
وكان باقي بعضشي مني
وكان ف القلب كام دقه
وكان رايح تلات تربع
وباقي مني يدوب شقه
والربع ال كان حيلتي
داير بيه تقول سقي
هناك اسقي لعطاشه
امحي احزان ومتعاشه
وأمسح دمعه محرومه
ف عيون بسمتها متحاشه
قلبي وجعني من زني
فاهم فيا وعامل فني
كاتبلي ع صبر وتأني
وقالي عيش
وانا الباقي بعضشي مني
ولا مسلم
بروح ساكت ولا اتكلم
وانا م جوايا بتألم
غدار وف صفحتي علم
ولما يعدي واشوفه
طبيعتي تخليني اسلم
وحاول انسي
ماياما كتير طبول دبت
وياما كتير قلوب طبت
ولا ماتت ولا سبت
لكن بحلوها الباقي
تكبر فيه وليه ربت
وانا عايش
ودمعه بتزاحم دمعات
لاضحكايه ولوحتي فتات
وبسمه مكشره مني
ورصداني
تقولش ليا قصداني
وراسمه سبعه حواجبها
وتعباني وتاعبها
لانا عارف بأيه ارضيها
ولا حالي بقي عجبها
وخدت الضحكه ف اديها
وعصتها
وجابت ال مش فيا
وجوا النن رصتها
وبتشاور و تقولها شايفه
صبحت ضحكتي خايفه
وتفارق
و حالي ف الهموم غارق
بيتحسر
وسامع... عضمي متأثر
ودب الغدر بيكسر
ومصمم
انه لضحكتي يكمم
و يخيب ف رجاه ظني
لكن عايش
ولو باقي بعضشي مني!!!
بقلمي/محمود عفيفي دومه
ليست هناك تعليقات:
إرسال تعليق