المارد العربى
................
المارد العربى
عارفينو
الغيور على
عرضه وعلى دينو
بياكل الصخر
فى وسط النار
ولا يقبل حد
يهينو
اتقال فيه كلام
واتقال اشعار
من اول عروه
لحد الجخ
..
ولما المال احلو
ف عينو
اكل العيش الحاف
بالفينو
شرب الفوديكا
وكل كنتاكي
واتمزج بكباتشينو
وترامب سباه بالجزيه
وعشانه جدد دينو
المارد العربى نخ
..
المارد........ نخ
ومافيش اخ
بيسند اخ
..
النتن الصايع مطمن
بالصمت العربى
ومتأمن
فى عيالنا بيقتل
ويطُخ
ومافيش اخ
بيسند اخ
..
يا اهل القمه
اتلميتوا
على شجب وندب
اتبطيتو
وبكفته وطرب
اتعشيتو
..
عمر كلامكوا
ما وقف حرب
وإكراماً ليكوا
زاد الضرب
..
ولا خاوفتوا
ولا هتيتوا
..
زى ما رحتوا
زى ما جيتوا
..
وكأن الطير
على راسكم
ش خ
ومافيش اخ
بيسند اخ
...
الناس فئساكو
وفئسينو
وماحدش قام
حمر عينو
او غار على عرضه
وعلى دينو
أو قال بزعيق
كلمه تدينو
أو حتى ياراجل بخ
ومافيش اخ
بيسند اخ
..
طب طرد سفير
أو قطع علاقه
وبلاش م القرد
الغاز والطاقه
أو أى هتش ونتش
وكدب وجخ
ومافيش اخ
بيسند اخ
..
هو الخوف
طبعاً ع الكرسى
وترسى المركب
زى ما ترسى
وانسى حكاية
اخ واخ
من عندنا
ما هتسمع طخ
ومافيش اخ
بيسند اخ
..
ارض العزه
طلعت فخ
مين بيماطل
مين بيفاصل
مين بيناضل
حق وباطل
..
ومين غدار
بيشق الجنب
وف عب ترامب
فلوس بالكوم
حط وضخ
ومافيش اخ
بيسند اخ
..
انا مش محتار
بين جنه ونار
مين ع الحق
ومين غدار
جيبتو الذل
وجيبتو العار
المشدود
ف زمنكم رخ
ومافيش اخ
بيسند اخ
ولا سمح الله
مالناش اخ
محمد وحيد
******..........****
ليست هناك تعليقات:
إرسال تعليق