زجلية تحت عنوان:
شمس لْحق ***
لحق
تحت نعالة لباطل تسحق
داروا به لمناشر
ها السايب ها الداسر
ضاق لويل وتخنق
لباطل نشر جناحو وفرفر
فقست بيوضو جور والحق تقهر
صرخ ؤ ما نفعو صراخ ...
شد الركنة وترهق
السادي والتراس صفق
عجباتو الصورة لِ وهمو تيق
باش مات في الصدور الصدق وغرق
مسكين مكسر جناحو ساير يقاوم
طالب غ لفكة من صنم نكار ظالم
ما عاد يخاف الله مزندق
ما عطى وصية ما صلح ولاد
ما بنى حكمة شلاهبي فارغ كذاب
كسا لمعقول بجلد الذيب ...
زور وبهوت والحال تخربق
لباطل ب لبهوت حما عصابتو
الضرسة كواها بحفنة من شكارتو
انتصر وخلى لحق وسط لغفلة يبرقق
تناسلو دعاتو وتعفنت النفوس
عاد الصادق منبوذ لغاه مسوس
ؤ ما بقى فاش تشد وفاش تيق
لحق حلف ايلا تراجع
وخا وحيد نقز كَاع لمواجع
دعامتو يقين قران لِ بالحق نطق
قال يتهز حتى يعيا هو الباطل
يعلا فوق منو النقي والصادق لعاقل
واخا قلال...
بالصبر يفك قيود لمسخ لمعتق
انتفض لحق باش يصون حقوقو
لقى راسو منبوذ تْسدًت عروقو
ولعجب ما لقى حد صافي...
ولا ب لوفا مسوق
لحق زعف عاد يندب وينين
ما حايطين به غ لْفاع والثعابين
ركب جناح الهربة ...
وشموسو طفات...
ؤ ما عادت تضوي ولا تشرق
حيت بنادم عاد دينو باطل
صفق وراهم كل مكري سافل
حطب جهنم ل فيها غدا يتحرق
ؤ غابت شمس الحق
***الشاعر والزجال: أحمد الكندودي ***المغرب
ليست هناك تعليقات:
إرسال تعليق