السنه الجديده ..
حد وطي
عليا سألني
تحب تقول ايه
لسنة 2022
رديت قولت
انا اصلا
كنت مابطقهاش
ومهما تعمل فينا
كنت ضاربها
طناش في طناش
والحمد لله
انها خلاص ماشيه
وربنا يرحمنا
و ما يرجعهاش
وكفايه اللي
عمله فينا
اللي اسمه دولار
خرب بيتنا
الله يخرب بيته
وخلانا نعيش
اسودها نهار
يالاه تغور
في ستين داهيه
قوام في الحال
و اهو يمكن تيجي
سنه جديده
ونشوف لينا
فيها يومين
ونشم نفسنا شويه
والجنيه يمكن
يطلعله فيها
يجي كده قرشين
والبنك الدولي
يوافق يسلفنا
التلاته مليار
خلينا نحلم
موش يمكن
زي ما وعدونا
يتحسن حالنا
و يخلوا الفقرا
يشموا اللحمه
وياكلوا ممبار
بس مصيبه
ليكون ده خازوق
و تطلع زي
اللي سبقتها
و هايدقوا
في نعشنا
اخر مسمار
وتكون ليله سودا
وموش طالع
ليها نهار
واحنا بنصدق
ان الحال
يمكن يتعدل
يا اخي ..
موت يا حمار
شاعر مهندس : احمد المرشدى
15 ديسمبر 2022
