مش قادر اعلق/د طارق النجدي مجلة روائع الشعر والنثر وفرسان الحرف

 مش قادر اعلق بالكلمات ..

و انا عايش بين أحياء أموات 

وركام غزة مليان شهداء

و جبان واقف ولا شربة ماء 

ولفافة شاش ...

وتراب و غراب ينعق ..ينهى 

عن حتى الكلمة وقولة..آه 

ورجال خيالات ..عاملين ماتشات ..وغسيل المخ 

والدنيا ترخ مطر الخيبة 

و العيبة سكات ..أموات أحياء 

بنعد الشهداء ..ويعد الصمت 

خنازير رايحين جايين ..

لابسين بهوات..وكلام تحاليل 

اخبار ..نشرات ..

وانا مالى ومال الجار يا اماي 

وانا مالى ..ما شِلتْ بإيدي العار

مش قادر أعيش..زي الدراويش 

وآقول الله ..دي قيامة وبدأت 

ملامحها والكل نيام ..

لا صلاة ولا صوم ولا حتى قيام 

ح يغيّر فينا ملامحنا..

ما بقينا تيوس ...

بنعد فلوس ..

ونعد الشهداء ..و بنحوقل 

اسم الله علينا ..و حياتنا 

فى رغيف العيش .

شنابات ..و دقون ..والكل يهون 

ويغمس ذل ..يا صباح الفل 

يا حبيبتنا..رجالتك مش لاقية 

فياجرا ..!

لابسين طرحة وعليها عقال 

و تراب سينا يلعن فى أبونا 

و مِلّتنا..ما خلاص مُتنا ..

بنصلى ..نصوم ..وكمان بنحج 

خرفان تسأل سعر الخرفان 

الليلة بكام ..مين ح يضحى 

فى العيد و بمين ..؟!

وألوف شهداء ضحوا عشانك

لكن القربان..ما عجبش الرب ..

ولا نزلت نار تاكل القربان.

ولا حتى آيات القرآن..

و وليمة الروم ..تغرف ..تجرف 

و"غثاء السيل "..أمة احمد 

لسه بتحمد..مماليك اليوم ..

رؤساء ..زعماء ..روبابيكيا 

وباكية عليها عيون

ملوك ..لواءات..أمراء

سلاطين ..

رايحين جايين ..

و سلاحنا بيلعن ف سكاتنا 

 سكِّتنالصمت ..

استراتيجي 

و الموت ييجي.

.ويتُف علينا 

ويروح ويلف ..

يا خسارة يا بيبرس ..يا صلاح الدين ..

يا خسارة يا حمزة ..

يا تراب حطين ..

يا خسارة جينات ..

خلقتها بنات 

يا خسارة يا خالد ..

أنور يا سادات ..

السادة اسيادنا وآل البيت ..

ما دبحهم وٍلد معاوية ..خلاص 

و شيوخنا بياكلوا الفتة ..خلاص 

و الفتوى ..اهى جاهزة 

مش وقت جهاد ..

ولا حتى بيجاد..

و تتار و صليب ..

صهيون وقريب

مستنى المهدى كمان يظهر ..

شاربين في حشيش .

وللا الأفيون ..

نام فى دماغهم. 

مش قادر أحب ..

مش قادر أعيش وسط الأموات 

العمر اهو فات ..

نفسى فى طلقة تريحني ياناس 

ويقولوا شهيد ..

بس فى غزة 

يا خسارة يا عزة ..

يا خسارة يا عبلة ..

يا خسارة يا ليلى ..

عنتر بقى قيس ..

اتجن خلاص ..و رمى لنا السيف 

بيقول اشعار ..

صمت استراتيجي..إمداد..تموين 

و سرية اناشيد ..ومدافع ..

و أغانى الحسرة على رجولة ..

ستة اكتوبر ..سبعة اكتوبر ..لكن الجايات 

عند المولى ..

لما المهدى يظهر 

ويقول ..

يا جهاد ..يا جهاد 

ولا سنة وشيعة 

ولا حتى أخوان ..

ولا نسوان داعش..

ولا حتى فيران ..

أنصار الله ..

وكتاب الله ...

لا حماس ولا فتح ..

ولا حتى ميدان التحرير..

جايين ملايين ..يأجوج مأجوج 

دجال طالع من قرن الشمس 

كلها سنوات ..

أحياء ..أموات ..

عايشين ع الفول .

.خايفين م الغول.

كلها ايام ..

راح أغنى..واموت 

نفسي تريحني الليلة 

يارب ...

طلقة مدفع ..واللا رصاصة ..

والْحَق ف طابور الجايين لك ..

شهداء غزة ..و رفح و جنين ..

سامحينى ..يا غزة 

وكتاب الله ..

ما كنت في عمري 

فى لحظة جبان ..

سامحينى يا خالتى 

فى رفح ..وجنين..

وسامحينى يا بيت لاهيا..يا حطين