بلاش الرغيف
.....................
احنا اول الاوائل
ف كل أنواع المسائل
احنا أضخم احنا اطول
احنا اوسع احنا أرفع
من شعرة معاوية
وابعد من كل التفائل
إحنا اجمل احنا اتخن
من عزيره وام وائل
بس عنينا ع الرغيف
..
تقولى صابه الهزال
خس ومعجن ضعيف
كش كمان ووزنه قل
رفيع مكعبل خفيف
ولآاا يتأمر ولا يتبل
متنيل غلبان ونحيف
بردو عنينا ع الرغيف
..
سؤال بجد بسأله
محتاجينه هو ليه
قفلت معاكوا وزنقت
بهوئت خلاص وفرشحت
ما قضيتوا قبله ع الجنيه
جنب الريال اصبح كفيف
وغايظكوا ليه الرغيف
علشان بيسندنا الشريف
وضهر ساند للضعيف
وإللى مش لاقى الغموس
بيملا باطنه بالرغيف
واللى مفحوت ف الدروس
بيطمنه تمن الرغيف
واللى مش لاقى اللضا
وجيبه منه للفضا
بيحط همه فى الرغيف
الرغيف محور حياتنا
من غلاوته بنقطعه
ونحلف عليه
مين يصونه يبقى زاتنا
ليه مكانته نكرمنه
ونخاف عليه
عيشتنا واكل عيشنا هو الرغيف
..
سيبونى اعرف من سُكات
عايزينه ليه تانى الرغيف
يمكن أعلا برج ناقصه
لمبه لد و ١٠٠ رغيف
او مزارع الفسيخ
سمكها مفطوم ع الرغيف
ولا يمكن قطر طاير
نِفسو راحت للرغيف
ولا كوبرى بشكل دايره
نرسمه بشكل الرغيف
يمكن اكبر المساجد
جنب الهلال ناقص رغيف
جايز اضخم الكنايس
ناقصها أيقونة رغيف
يبقى شبكة الطرق
فيها خرم
حنسد خرمه بالرغيف
..
بس يبقى الطيرات
صواريخها بتطير بالرغيف
او المراكب والسفن
فى البحر ينقذها الرغيف
..
سره باتع الصغير
المدور المكعور
النحيف ابن الضعيف
ايوه احنا
اطول واضخم
واتخن وارفع
واعرض وأوسع
وعنينا بردو ع الرغيف
محمد وحيد
ليست هناك تعليقات:
إرسال تعليق