حاجه ….. تقرف
………..............
بتقول حاجه…….. إيه
حاجه تقرف
الكلمه إللى انا عايش بيها
والناس بتقولها تغنيها
بكل حروفها ومعانيها
حاجه تقرف
لما تقولها فى اى مكان
تلقى كل الناس بصالك
وبتسمعها بستحسان
وصللهم زى ماوصلالك
آه حاجه تقرف
لما طبق الفول…..… يتنمرد
ويربط نفسه….. على خمسين
والطعميه كمان…… تستعبط
قال يعنى اقرصها….. فيتامين
والقرص صغنن……. يتنطط
فى الطاسه…… بيلعب تمارين
مش عايزينك تهرى وتحلف
قول ويانا… اه حاجه تقرف
لما مديرك يبقى عانيد
قالب وشه
ضربه تحشه
بيدققلك فى المواعيد
شكله يغيظك
صوته يجنك
طالع نازل يخصم منك
يخصم بس
وعمره ما كفئك
فالح بس الصبح يزرك
وبصة عينه
عايزه تحشك
ولازم بسمه
وتفرد وشك
مش عايزينك تهرى وتحلف
قول ويانا… اه حاجه تقرف
لما صديقك…. عِشرة عمرك
وامه كانت…….. تشبه لامك
مره يبيعك…….. مره يخمك
وعادى… وسط صحابه يزمك
واكل عيشك…… ناكر خيرك
حزنه عندك…... فرحهُ لغيرك
مش عايزينك… تهرى وتحلف
قول ويانا…… اه حاجه تقرف
لما اللحمه………... تحلم بيها
واللى يجبها………... بيخبيها
ونِفس عيالك…… سرحت فيها
ولا تقدرشى…….. تقرب ليها
فوق الطاقه…………وتعديها
بتكسر نفسك……… وتوطيها
مش عايزينك… تهرى وتحلف
قول ويانا…… اه حاجه تقرف
لما جيوبك…… دايمن فاضيه
وكل ما تفتح باب…... مسدود
ومدامك….. طبعاً مش راضيه
وحبل وصالكوا… اكيد مشدود
والمصاريف… سكينه وماضيه
وبردك وسط الناس…. محسود
أن حياتك……. ماشيه وهاديه
وانت يادوب دخلك….. محدود
متكتف مضروب…...بالقاضيه
طقه بمش……… وطقه بدود
مش عايزينك تهرى وتحلف
قول ويانا… اه حاجه تقرف
لما تشوف…… فواتير الغاز
الاخماس……. تقلب اسداس
وتفجئك…….. فواتير النور
محتاجه……… لدفتر استاذ
ولسه كمان….. فواتير الميه
فيها محاوره…… فيها ألغاز
والبنزين والزيت والجاز
كله ياصاحبى ف الإنجاز
مش عايزينك… تهرى وتحلف
قول ويانا…… آه حاجه تقرف
لما المستقبل.... على حاله
يتعلق على درجه ونص
واخرتها شهاده.... بأحواله
تتعلق ع الحيط تترص
ومكان فى القهوه بيفضاله
على شيشه ومعسل قص
والشغل ديلفري أو توكتوك
مع شحته القص
أو أمن فى ملهى أو فندق
عل شحنة خس
مش عايزينك… تهرى وتحلف
قول ويانا…… اه حاجه تقرف
عايشين فى الهم وساكتين
م الكدب بنعبى ونغرف
احلف واستحلف عارفين
إنها الاخر حاجه تقرف
محمد وحيد
ليست هناك تعليقات:
إرسال تعليق