زجلية تحت عنوان:
جيب لعز ...او كحز***
جيب لعز
لِبلادك ...
أو كحز
ذيك طرطاقة ؤ زطاطة
لعياقة ؤ لهزان ؤ طقطاقة
راها م تفيدك وخا تبات تْنَقًز
ياك زعما نت لي خاصك تحمي لبلاد
قاري زعما ؤ فاهم مجرى العين و الواد
ساعة م عجبك وطن م عجبوك ولاد
تايه في مضيع لهدرة م نْتَج م فْرَز
اسيدي ديرنا عورين كاع ما تنشوفو
نت هو مول لحكمة لقمان ؤ سيدي بن يفو
ورينا حنة يديك ؤزيد بالنضج عزز
لفاشلين ثاروا تجمهروا ؤ هما خاويين
ركبوا لعبة القبلية والتمييز سنين
درباتهم دمية على طنيز ولخنز
دينهم بغض وتمييز وعنصرية
بغاوها غابة السيبة والهمجية
ؤ لي على خزعبلاتهم النعلة والف طز
بغاو يحكمو حسب لغاهم وهواهم
يستعبدوا الرجال كيفما بلجوهم وغراوهم
ذوك الأشباه العامرين حقد ودغل وفز
ؤ عوض م يجيبو للوطن كل عز
خانوه ؤ باعوه...
ؤعاد السفيه يتطاول و يطنز
فاسمع يا عقل الوز
فإما جيب لبلادك لعز
او شد لسانك ...
تكمش ؤ كحز
حيث انت غ عميل مريض انتهازي
عينو على الكرسي وعليه لاعب قمازي
حرابي م تعطي م تنفع م تكنز
أما ذاك الوهم ل علموك ديال شتت ؤمزق
شتم الحر بالعياش ونت مجرد بيدق
جوج حروف راس مالك ؤبهم تغرز
فيا ذاك الواعر الفاهم غ وحدو
كَاع ناس جُهل حيث عقلو قدو
ؤفاقد الشي م يعطي غ اللمز والدبز
أفكارو طايشة هدامة
باغي يقلب سفالها على علاها
جاهل مسكين ؤحسابو مقزز
فنوض ي لهدار عري كتافك ؤ جيب
الهمة والعز ؤكون منا حبيب
ؤ ل كان مخك عامر صدأ وحديد
كمل على هبالك حتى تكزز
جيب لعز
لبلادك...
او بعد ؤ كحز
***الزجال والشاعر:أحمد الكندودي *** المغرب ***
ليست هناك تعليقات:
إرسال تعليق