متغربين
ـــــــــــــ
طول عُمرنا عن أهلنا متغربين
والغُربه أخدت مننا أجمل سنين
وخدت معاها قلبنا خالى الأنين
واديتنا قلب فــ عز فَرْحُه يبان حزين
الغُربه صعبه سنينها قاسيه ومؤلمه
قَسوتها باينَه على الوشوش ومْعَلِّمَه
الصبر فيها ويل ومين يتحملُه
والعُمر فيها ليل وساعتُه مقَدِّمَه
فى الغُربه دايماً حِلمنا يجى الصباح
فى الليل بيسهر هَمِّنا ويا الجراح
والشوق لناس بتحبنا فوق حِملنا
ومعدش باقى فــ عمرنا قد اللى راح
ماشى الغريب فى طريق مايعرف آخرتُه
ومفيش غريب اختار تكون دى سكتُه
نداهَه نَدَهِتْ واما قَرَّبْ مِسكتُه
وان قال اسيب كلمة نصيب بتسكتُه
مكتوب علينا نعيشها من غير اعتراض
وعشان تعدى بنفترض ألف افتراض
ونقول مسيرنا لأهلنا حتماً نعود
ونقَضّى باقى عُمرنا ... لو بس فاض
كلمات / سامى النويهى
ليست هناك تعليقات:
إرسال تعليق