بوليستر.. ٢١٥
متوفر في السوق بوليستر
والمقلم والمكستر والمملح والمبستر
بس لسه فيه ورد بلدي..
لسه فيه ابنك وولدي منهم بروفيسور ومستر
الشيطان زرعه شيطاني راح وعشش في غيطاني
جفف كل نبع صافي في صدر غزة والليطاني
حش اش لكل قدوة.. فجره جايب ألف ندوة . وكام ملبلب
راح وكبب.. ألف شيلة من الهموم خد لكومة كل كوم
خلي بكره ينسى إن جاي بكره
ماحي كل فنون العوم
غفلة جايبه لكل واطي.. وكل ناهب وكل ساطي
جه وسارق انبساطي وبدل البسمه بموت
أي غمضة اي ومضة تبقي آيل للسقوط
والسندريلا قلب جورة لسه بتصارع لحوت..
والزمن أعذر وانذر . زمرة صارخ ألف توت
والحاقد لعينيه محمر.. غل ساكنه وليه مخمر.. عافيته ليها مشمر
(والشوفار) ينعق بصوت
والعالم بتسابقه عالمة.. والأديب بتخونه كلمة
وأنا وأنت طال دعانا ويارب هاتها سالمة
وسالمي بتنده سلامة في عيونها بير غويط
ميتة بريحة ملامة.. نفسها من الفجر خيط
جوفها زاعق الحقوني مش لخوفها
حسره دبت في القلوب رعشة ترجف في كفوفها..
موج وعاتي راح حدفها والقارب وسط محيط
الحقوني.. قلب حجري ألف أفعى..
ألف عقرب ألف ديب
والمرار في حلقي ساكن.. وألف حسرة وألف عيب
اخواتي اللي حتة مني.. هما مش حاسين بأني
إني شعري تاه نجومه وإنه أعلن للمشيب!!!
طحن فاضي بس سامعه للدبيب
انصبوا لسواري حب في القلوب.. اسعدوا كل الدروب
ارفعوا المرفوع بضمة مش بكسرة
انصبوا المنصوب بفتحة مش بحسرة
فرحوني بامتيازكم أو بنصرة
ببسمة ترسمها مراكش تضحكها صنعاء وبصرة
اكتبوا إن إحنا في مضارع في كل حارة في كل شارع
في الكنيسة وقلب جامع.. اندهوا..
يا خلق هوووو..
إحنا أمة.. إحنا كلمة.. شال عقال كرافت عمة
وإن إحنا يا خلق أسرة
إحنا.. آس.. وعمرنا ما كنا.. دو
وحدوووووووا
ليست هناك تعليقات:
إرسال تعليق