...دومه!!! ٨١
عم دومه كان ده جدي
قولت اعمل معاه حوار
والحوار بشكل ودي
اعمل ايه غلب الحمار
دون ملامه او عتاب
س سؤال?
... وج جواب
وف الكلام ناخد وندي
وللحوار فاتحين لباب
جدو دومه.
... ياريت تقولي
.لوكنت عايش تعمل ايه!!!
وسط خلق وقلب غابه
تاكل الفقير ماتشبع
تروح تحلي بالغلابه
بشر محسوبين علينا
والقلوب!. قلوب ديابه
تعمل ايه!!!
تعمل ايه لما يشدك
ريح لفقر وجاي يهدك
ومكشر وكأنه ندك
ومغيم فوقك سحابه
تعمل ايه!!!
بس قولي الحقيقه
ولو عندك حل و طريقه
ونصيحة تكون صديقه
من زد z لحرف ايهA
قول ياجدي!!!
تعمل ايه!!!
شوف ياولدي ملعون زمانكم
الفرح ليه تاه عن مكانكم
حزن راكب ليه ساكنكم
زاد لهم ... بهم ليه
انتو ايه!!!
احنا ياجدو... دومه
حيلنا واخد الف شومه
والعصافير عاصيه تغرد
باقي بس نعيق لبومه
والجراب خالي الوفاض
عمره مره علينا فاض
وال راح عمره ماعاد
ببصل ولا حتي تومه
طب ليه ياولدي!!!
هو مفيش بينكم حليم
ولا مابتسمعوش لثومه
لا يا جدو...
احنا ف .ودانا العويل
ليل نهارنا. نهارنا ليل
الكلام. شرحه يطيل
ولقمه بطعم مرار
لاعاد مروه اتهد حيل
صحيح يابني...
جيلنا.كان من احسن جيل
كان ف حفانا بركه
ونكرم ال مش زارع
ولو كان صاحب تركه
خيره يغطي كام شارع
وكات دورنا الحيط ف الحيط
وانايا بتسقي ... يجي كام غيط
وطبخه علينا تتفرق
وكان خير ربنا مغرق
جرالكم ايه!!!
ده كنت لما اكون قاطف
اعبي واهادي ف مقاطف
لبيت عمك وعماتك
وع المحتاج اكون عاطف
ياجدوا سقيتك ... نشفت
وسطح البيت بقي فاضي
رضينا بالهم لكن هو
بقي بينا ماهوش راضي
طب شوف يابني
صحيح حالكم ماهو عاجبني
ارجوك سيبني اروح سيبني
ضميري يابني انبني
ولكم دعواتي ياولدي
صابني الهم ايه جابني
يارب تخضر ايامكوا
تثبت ع الحق اقدامكوا
يارب يصلح ليكوا امامكوا
يارب تفرحوا يابني
وتلقوا سعاده قدامكوا
سلام يابني.......تعبتني!!!
ليست هناك تعليقات:
إرسال تعليق