دقه زايده
………….
دقه رايحه ودقه جايه
هى دقه واحده زايده
دقه تخلى الضلمه نور
والهموم تطرح زهور
وانسى مين عليا جار
..
وانتِ طيفك بيحاورنى
بدقه واحده…
بيشاغلنى ..ليل نهار
..
دقه بتطيرنى فوق
دقه ماليه حياتى شوق
والشوق كاوينى
ب ١٠٠٠ نار
بدقه واحده بتوحشيني
وانتى ساكنه جوه عينى
حتى عينى بتوحشيها
خايفه ترمش وانتِ فيها
تفوتها لمحه من جمالك
أو بسمه…. بتبين دلالك
او شعره طايره فوق
خدودك
لما تلمسها…….. باغير
..
ياللى قلبك….. قلب طير
طاير يرفرف فى السما
بس قلبى….. ليه اسير
كلميه ….....يمكن يحن
اصل قلبى….. مسه جن
جن ساكن… فى الرموش
دباحين……مابيرحموش
جن فارش….دنيا خضره
يأسر……… بغمزه
يسحر…….. بنظره
سهام عيونه
تمللى حاضره
يدبح………ببسمه
يقتل………بهمسه
ويطفى نار الشوق
بلمسه
..
اسرح واغمض..… واندهك
تطلعى…….. من جوه قلبى
مالكه روحي…. مالكه عقلى
أرمى نفسى….. بين ايديكى
اشتكيلك
إن قلبى……. نبضه منك
وفرحته منك………وليكى
وإن عينى........غصب عنى
دنيتها بس.....ف عنيكى
وليلى….. من غير عنيكى
مايستحقش السهر
والصبح يجي..….قبل المعاد
بدرى…....يسأل عليكى
ساب القمر… فوق فى السما
وانتى عنده ب ١٠٠ قمر
..
ولما بتجينى…. فى منامى
بتواسينى……. تونسينى
وتحتوينى
وبضمه واحده
انسى نفسي
وانسى اسمى
وانسى عمرى
وانسى أيامى وسنينى
..
اتوه فى نظرة من عنيكى
ادوب فى لمسة بين ايديكى
..
انت كل حاجه فيكى زايده
الحلاوه ايوه زايده
الشقاوه بردو زايده
وتزيد كتير ف رقتك
والطعامه زايده زايده
وجوه قلبى دقه زايده
دقه واحده دقتك
دقه خاللت ناره آيده
وانت عارفه دقتك
محمد وحيد
ليست هناك تعليقات:
إرسال تعليق