مسحراتى *
٢٠٢٤
.................
اصحا يانايم
من غير شتايم
العقل هايم
ادفع وأبج
بعدين تدوء
..
صاحبك وعايم
طرطء ودانك
عشان تمثل
دورك كصايم
جايز تفوء
..
هات الطبله
وهات العود
والجوده دايمن
بالموجود
اسمع وركز
فى الموضوع
..
الكلام…..
بالكلام مردود
والسكات
آلم بيوجع
كأنه طلق نارى
بارود
..
وجوه العين
حجاره صلبه
تطفى اى شموع
مش قلق ودموع
امتى تانى
صوتنا يعلا
ونبقى تانى اسود
والكرامه والشهامة
امتى تانى تعود
ونطلع من بير المهانه
وكفيانا خضوع
..
العيال
بتموت هناك
مش م الرصاص
بيموتوا حسره
بيموتوا جوع
..
والشفايف عندنا
بنمصمصوها
مش حسره وزعل
بعد الفطار م الشبع
والموت هناك
على كل نوع
..
يا مسحراتى
عندك دليل
مكسوف اقولك
مستحيل
إللى بيجرى
فى عروقنا إيه
.....دم حر
ولا دم متخلط
راجوع
من الظلط مصنوع
فى التلج متحنط
من سنين منقوع
..
لو دم حر
كان فار ف العروق
وبان عليه الاسى
وف الصباح والمسا
من كترالدموع
بالقليل موجوع
..
ياصاحى نام
يمين تلاته
ما أنت قايم
عامل دماغ
فى التمام
اوعى تصحا
جايز تفوق
فى المنام
ويتقبل منك صيام
القصه مش عطش
أو جوع
..
القصه جسد واحد
لو عضو منه اشتكى
باقى الجسد موجوع
فى الصيام
فى الفطور
وفى كل ربع
من الربوع
وهو ده الموضوع
ليست هناك تعليقات:
إرسال تعليق