( براطيش. )٤٩٤
انا حرفي ولامحتار
ولا شارب منقوع براطيش
لا متعبي ف كام قفه
ولايصهين و مايجليش
وسافف م التراب سفه
.وبيجري.ساعات وبيبرطع
لعب ف الحاره للرفه
وجتته للشقي مرتع
وواخد البرد ع الجته.
وضربه شمس بعديها
وكام ازمه يعديها .
ومتعدش. لكام دسته
ومكحرت وفي الحاره
ع رصيفها وع حجاره
ومتصور.مع الواد ال متعور.
وام سعاد وهي قاعده بتأور
بتنجان محشي. وبتلاغي
وروح خابط ع صداغي
وحرفي قاعد بيتصنت.
وودنه هناك مع الكلمه ومبنط.ولا يروحشي
معاه ف عينه لكام شوفه يكون .شافها.
وكام برده لكام طوفه
مسجلها واكيد طافها.
ووسط الخلق عامل ضيف
.مابين مراجيح المولد
وبين واحد مصاحب كيف
وده عنتر وده عنتر
و ماسك لاخوه السيف
وحصان. بيجر عربيه.
وتتحير مابين متاهات
مابين هلفوت ماسك سيفه
وبين حصان فتح فتوحات
وحرفي ماشي بيتلكع...بتأني
مره دمعه من عينه.ومره تشوفه بيغني.
ويتسكع. .ويقوم ضارب
ههههه....طبق كشري.
علي كوبايه حلبسه.
وقرشه يهون ومش دقي
ولادقه
دنيا عليها كتير دقه وعصير بلمون.
ويمخمخ. يدب الاكله.ويسخسخ.
واقرب قهوه يروح قاعد
واحد قهوه عشان يحبس.
ويشرب ويكمل اللفه
وعروسه.وم الفرح زفه.
وفرجه.وليها ماجلي
وده وسع وده وسع
.ودي واحده بتدلع بتتأصع
.مفيش مشكل ولا تأزم.
وده بيرقص ويتحزم.
ويديها ...ماهي الحاره لبعضيها
وزغروطه مع هيصه. وتعدي.
وناس ماشيه وناس تجري وناس عاقله وبتهدي
وانا قاعد والعيشه دايره. وناس حايره
وخيالي بيعيش.
مابين مجاذيب وبين دراويش
واقوم واقف وبدروخ.
انااتخضيت منيش واخد ع الترويش
وبطوح.واقعد تاني ولا اروح.
واقوم ماشي تاتا و بشويش
ومخوخ... انا شربت واحد قهوه.
ومضروبه بمنقوع براطيش!!!
ويدوب خرجت م الحاره
. دخلت ف حاره تانيه
وبكره احكي عن كيداهم
ولما قابلت عم عليش..
سلام
ليست هناك تعليقات:
إرسال تعليق