الأحد، 10 مارس 2024

سكران/الشاعر محمود عفيفى مجلة روائع الشعر والنثر وفرسان الحرف

 (سكران )٤٩١


كنت بسكر.!!

ايوا كنت سكري... ساعات

كنت احاول انسي نفسي

وال فات.

وال مات.  

وال شويه منه باقي

صوره ع الحيط. ذكريات

كنت .بسكر م الهموم

 لما يجي الليل يزوم.

ويقولي قوم ...

انت نايم. ومغمض عنيك.   

ياه ياقلبك

ازاي وانت خاويه بطنك

م الوعود اوم ودور

قوم وولع ...للبابور

ولا بطنك ناويه تدي الجوع. خبور

كنت سكري...لما فكري. يروح بعيد 

ويرجع مدلدل ودانه ...مش سعيد.  

والدموع مليا عنيه ...واخد بخاطره 

واحضنه وأطبطب عليه. 

واقوله مالك

يقولي ماانت ال خلتني اسرح

شفت هناك ناس بتفرح

ضحكتها عاليه تجلجل

ومكري همك.لأركانك مذلذل

وناس تتفرج عليهم ودنيا مسرح 

كان نفسي اضحك زيهم .

وقول آه لو منهم

وما لقيت حد نصرني

بس لقيت الضحكه غاليه

.جاتك والذل كسرني 

جاتك والغلب آسرني    

تعرف انت تصرفه

يلا اسكر ...

بس وحياتي عندك 

بسرعه فوق ...ولما تسرح

اوعي تاني ...تطلعني فوق

اوعي تاني تخليني احس 

اني واطي  وفيه فروق

ويلا اصحي وتعالي نسعي

ما احنا وهما شكل واحد

ولا دول مش زينا 

ولا انا مش ابن  تسعه

ولااسيبك امشي واغور  

 ويفضي تاني الماجور .

وارجع اترجي  الاماني

زهقت  تلغرافات عزي.

نفسي مره يكون تهاني

السكاري مش ازازه

السكاري ف وادي تاني

والخمور ليهم مجازه

لاحسوا يوم الامي

ولا فهموا حروف كلامي  

ولما برميلهم ...سلام

تتهز راسهم دون كلام.  

يلا فوووق... ويلا..بينا نطلع لفوووق  .

ونجيب الفجر ال  فات

وال راح ... وال ساح 

ونهدهد  .لصوت نواح 

ونرجع  حتي ال مات

يلا فوووووق!!!

بقلمي/محمود عفيفي دومه


ليست هناك تعليقات:

إرسال تعليق