فسخانى
………….
ياما دقت
ع الراس طبول
كفايه خبط ودقدقه
يقولك اصبر
جايز تنول
لا طولنا عدس
ولا طولنا فول
وانسى نشوف الشبرقه
..
أصل الكلام
شرحه يطول
لا شفنا زيه
من الفرنجه
ولا شفنا زيه
فى المغول
خليك مَرن
زى السفنجه
لا ليها عرض
ولا ليها طول
من غير هزار
أو تريقه
..
ونقول كمان
تعبنا من كتر الندا
بتهرتلوا بالكلام
طبالين ومعدده
اللى فينا ده حرام
ما تعملش م العِدا
وصوتنا راح
من غير صدا
ما فضلش
غير الوءوءه
..
إللى إحنا فيه
مش فى التاريخ
ولو بناها
بتاع فسيخ
والنصيب لازم
يصيب
تاخد خازوق
أو تاخده سيخ
يا إما تاخده دقدقه
..
زهقنا جد مش هزار
كل حاجه غاليه نار
لا فيه زفر
ولا فيه خضار
هنأكل العيال فشار
ونلغى طقة الفطار
او نعبيهم سولار
ويبقى عشاهم سئسئه
..
وبدئنا عهد النئنئه
واى حاجه مبحبحه
الموضه تبقى مخنقه
ممنوع عليكم الكلام
وممنوع كمان البحلقه
وكل حاجه بالتمام
مقرطه ومحزقه
وانسوا زمن البعزقه
..
صنف واحد فى الغدا
وتنام خفيف من غير عشا
ومافيش هزار ولا فرفشه
والإلتزام تحت الغطا
وانسوا الحُما والبلبطه
وكل حاجه بالكروت
ميه غاز او كهربا
وفيه كروت للشقلطه
ولما تدخل فى النظام
وتطاطى تسمع الكلام
وتفضى راسك م العلام
صوت الغراب
يبقى عندك زقزقه
وتحب كتمة النفس
وكل حاجه مزنقه
ادفع كروتك بانتظام
وارفع أيديك فى الهوا
وقول بفرحه وانسجام
مرحب بزمن الخوزقه
محمد وحيد
ليست هناك تعليقات:
إرسال تعليق