فلان ..؟
فلان اللى سكتت فى إيدى حروفه ..
فلان اللى روحه طلعت ف إيدى
بانقله دمى ..
وينقل لى همه
وذله وهوانه.
وريده ف وريدي
شاف نورها جنَّة
قال لى سلام
ماكان ابن عمى
ما كان ابن خالى
وما عرفت اسمه
فلان الفلانى..!؟
عتابه دبحنى..
كان إبن "غزة " قال لى :حرام
بتقدر تنام ..!
وتسهر وتضحك
وأنا دمى سايح
وأنا دمعى نايح
بتعرف تهلل
على ماتش كورة
تشوفني ف صورة ..
تمصمص شفايف
زي الحريم .
فلان الفلانى ..
دمه ف ايدى
مسك الختام ..
قالها : سلام ..
شاف الحقيقة
فى آخر دقيقة
وصف لى الجنان..
وعدنى بهدية
شفاعة شهيد ..
ما فيش سكة أروح لك ..؟!
تعالى شهيد ..!
سامحنى يا خويا
فاضل بس تارك
وأجى لك شهيد
ليست هناك تعليقات:
إرسال تعليق