دى ترجمة لقصة حياة مطرب
شكراً قوى
حاولت انقى من الجُمل أجمل حروف
عشان ازيح عنكوا الحَرَجْ وامحى الكسوف
شكراً قوى لكل واحد كان سبب
إنى أدوس ع الصعب واتحدى الظروف
الشكر واجب للى منى اتبرؤا
وقالولى حلمك يابنى صعب تحقَّقُه
وحلفت ليهم ح ابقى حاجه فــ يوم واكون
وحلفوا عمرى ما ح ابقى حاجه وصدقوا
شكراً لُكُم على غدرُكُم ياهل المروه
على كل طعنه اتسددت فى القلب جوه
فى وقت مانتوا بظُلمُكُم دايسين عليا
كات كل ضربه منكُم بتزيدنى قوه
ياللى حاولتوا تْوَقَفوا فى السكه قَطْرى
وياما قُلتوا ان الفشل مكتوب فى سطرى
مجاش فى بالكُم ان انا ح اتحدى نفسى
وح يجى يوم فيه ربنا يُجْبُر بخاطرى
جه يوم ارُد ومين يصُد الرد عنكُم
انا ياما شوفت سيبونى اخلص تارى منكُم
انا م البدايه بقول يارب وربنا واقف معايا
وبرغم قسوة قلبُكُم زعلان عشانكُم
وماتتداروش كدا م الخجل لما تشوفونى
وبلاش عيونكم تتكسر قُدام عيونى
انتوا اللى كنتوا بتبعدوا وبتبعدونى
دلوقتى فى اللى بردده بتقلدونى
وصِلت لكن بعد توهَه فــ سكه ضلمَه
قابلت فيها ناس ماليها الحقد ظالمه
ع الشوك مشيت ولا يوم لقيت
غير بس رحمة ربنا ودُعاكى يامَّه
أنا اللى خد منى التعب عمرى اللى فات
أنا كنت دايماً ع الوجع بصحى وأبات
قصة حياتى ح تتحكى بكل اللغات
بس اللى ترجم قصتى من حُزنُه مات
سامى النويهى
ليست هناك تعليقات:
إرسال تعليق