( غداره. )٢٢٦
باعتني الدنيا وراح مالي
وضاع أملي مع جمالي
وزادت فوق همومي هم
تزيد بيها في احمالي
واحمالي تشيلها جبال
ومن حالها لأسوء.حال
بقيت تايه في صحراكي
وكأني ماكنت يوم جمال
وراحت كل حواديتي
وتاهت منها البسمه
وكتبت دنياي كام كلمه
ونسيتني من القسمه
وضاع العمر في حروفها
وتعب الشوف من شوفها
ولا داريه ولاحاسه
بحس حروفي لحروفها
وانا ال كنت يوم جمال
وامشي الليل وسط جبال
ولا يعنيني اسد او نسر
وصوتي يخض بالموال
تتوه الخطوه من رجلي
وتمشي تروح عني بعيد
واجي اجمع لبكره حيل
تقولي اسمعني وعلي فكره
تقولي الجري بقي ذكري
واقول للخطوه
ده انا ال جاري
وانا ال كنت يوم شاري
تبيعي وتشتري غيري
وراح زمني ومش داري
تقولي خلاص راح يومك
وانا ماشيه ومن غيرك
وكتر الدمع وهمومك
وجه غيرك وجاب مهري
واصلي تعبت من سيرك
صحيح دنيا وغداره
وراكبه بس مع الراكب
ولينا السوده نضاره
ولينا الحزن ليه مواكب
مفيش مره تيجي تصالحي
ولامره تيجي ف صالحي
ولا تطبطب ولا تواسي
وتمحي لي في يوم جرحي
انا عايش وبعافر
واكيد لليأس بيه كافر
ولو كنتي صحيح دنيا
انا برده ولد حافر
كاتب اسمي علي حيطانك
وبيدي وبالضافر
...........ودنيا
ليست هناك تعليقات:
إرسال تعليق