الشاعر حمادة مختار ... لو كان بإيدي

.................... لو كان بإيدي ...!!! ..........................
لو كان بإيدي كنت أنسي هواك ............
وأنسي حكايتي ف الهوي وياك ...........
ياما بتوعدني ولا بتوفيش ...........
ولحد امتي هفضل استناك .
الحيرة ويا الشك ويا ظنوني .............
والهجر والحرمان كتير بكوني ............
ارحم فؤادي م العذاب والضني ...........
وارحم دموع اتحجرت ف عيوني .
ياقاسي ليه تهجرني وانا بهواك ..........
ما قدرت في بعدك احب سواك ..........
انت اللي ليا مهما تهجر قلبي ............
وانا مش بإيدي اني انسي هواك .
لو كان بإيدي كنت انسي هواك .
*******************************
العمر بيعدي وانا مستني ...............
يمكن تحن ف يوم وسأل عني ...........
طال انتظاري وانت مش داري ............
والشوق إليك ف البعاد غلبني .
ياما حاولت انساك وانسي الماضي .......
وانسي ليالي السهد وانت قصادي ........
لقيت عينيا في هواك سهرانه ..............
وقلبي عن نسيان هواك مش راضي .
ياقاسي ليه تهجرني وانا بهواك ..........
ما قدرت في بعدك احب سواك ..........
إنت اللي ليا مهما تهجر قلبي ..........
وانا مش بإيدي اني انسي هواك .
لو كان بإيدي كنت انسي هواك .
*************************************
لو كان بإيدي قلبي يرجع خالي ..........
او حب تاني ينشغل به بالي ...........
ساعتها كان ممكن اقول هنساك ...........
وعينيا ترتاح من سهرها ليالي .
لكن اعمل ايه ياللي مالكشي امان ........
ياللي سقيتني من كاس الحرمان .........
مهما انكويت بالهجر مش هنساك .........
علشان هواك اكبر من النسيان .
ياقاسي ليه تهجرني وانا بهواك ..........
ما قدرت في بعدك. احب سواك ..........
انت اللي ليا مهما تهجر قلبي ..........
وانا مش بإيدي اني انسي هواك .
لو كان بإيدي كنت انسي هواك .