الشاعر مراد مصطفى مراد ... مسافر يا بهية

مسافر يا بهية

يا بهية أنا مسافر علشان اسد الدين اللى عليا
خلاص سايب أرضى ومهاجر يا وليه
وصيتى ليكى بس الواد سيد وبدريه
آه لو صبروا أصحاب الديون علىَّ شويه
صعبان علىَّ نفسى القمح طالع حزين قدام عنيه
اقولك أنا أركب القطر وبلاش طريق الزراعيه
تعرفى ليه يا بهية:
علشان ما شوف الزرع اللى ساقيته بإيديا
بودعك يا بهية وانا مسافر وسايب بلدى الجنديه
أوعاكى تنسى تسقى الشجرة وجوز البنيه
والبقرة اللى حيلتنا مربوطة هناك فى الزربيه
أنا ماشى يا أم عيالى آه :
كان نفسى أخدك فى حضنى شويه
مع السلامه يا زبدة وعسل فى الفجريه
ولهطه قشطة وحليب وش الصبحيه
مش هاين علىَّ اسيبك وامشى يا بهيه
أسيب كل الحلاوة دى والحنيه
وكل ما يقول القطر توت ويتحرك انا روحى جوايا تموت
قطر وشايل حكايات كتير على كراسيه الحديديه
وكل واحد بينزل فى محطته بالدور لما توافيه المنيه
ومين يتحمل السفر ويركب الغربة والمر يا بنتى يا بدريه
آه يا دنيا لما بتيجى على الفقير بتكونى آسيه وعنديه
لا ينفع معاكى حجاب يشيل الهم ولا أضرحة ولا أوليه
إلا اليك يا صاحب الأمر يا خالق الغلابه والاغنيا
تعين الغلابه وترزقهم وتحقق آمالهم والأمنيه
احلامى بسيطه يا خلق :
اربع حيطان ورغيف وحصيرة وفوقها بس بطانيه
ولو كنت عازب يبقى وظيفه وبنت ناس حلوه صبيه
هى دى احلامى بيقولوا عليها الادبا معرفش ايه ورديه
فلاح بسيط على قد الحال ،، لا شهادة ولا دكتوراه فخريه
انا من بيتى لأرضى وزرعى والفاس والميه
وارجع عشايا عرقين فجل وبصل وجبن
كل ده فى طبق واحد على الطبليه
فى دارى فرن وصندوق خشب والهدوم مبليه
ودهبى صفيح ومحفظتى تعب بالتراب محشيه
وزلعتى المش مفتوحه ومن كتر الايدين مكفيه
وحياتى بالرضا والصبر محصنه ومحميه
الف حمد وشكر دى نعمه وديمها يارب عليا
حياتى جميلة وراضى وبالشقا مرويه
لا فيه طمع فى منصب ولا ميول سياسيه
وزرعى طالع جميل لكن الآمال محنيه
وخيرى دايما لغيرى والنفوس منسيه
يكفينى نيلى وصاحبى له منى الف تحيه