الشاعر محمد صالح

#جديده
(الألوان)
#محمد_تيكو
واعود تاني مع الألوان
ألون ضحكتي السوده
أرسم لوحه فيها بيبان
يطير دخاني م الأوضه
مانا مخنوق من العتمه
تعبت خلاص من التفكير
لأمتى هعيش مع الضلمه
لازم حاله من التغير
جدار صمتي بيخنقني
يمنعي أني أعيش يومي
فنجان قهوه مصاحبني
وريحة البن ف هدومي
دي أوضتي سقفها واطي
وآن الوقت أبقى فوقيه
لأمتي هكون أنا راضي
نزول تاني كفايه عليه
ده عضم الضهر متكسر
بقى يقصر ف شيل الهم
تعبت خلاص من المنظر
حيطان سوده بتنزف دم
وصور الماضي بتتبروز
قدام عيوني بتجرحني
ولو فيهم صوره تفرح
تجي اللي وراها تدبحني
وشمعة حلمي ف الزاويه
 وبتدمع شمال الشيش
توعدني بكره تقول افرح
بكل وعودها مبتوفيش
ولحالي كده بقيت عايش
صديق للحبسه والأركان
لكن نويت أكون طايش
واعود تاني مع الألوان
وألون ضحكتي السوده
يطير من دنيتي الدخان
                         #محمد_تيكو