""""""ياسكر ودايب """""""
"""""""""""""""""""""
ياسكر ودايب في ماء نيلك يابلدي
ياشمس مزهزها وردي وكاشفه النهار
ياجميلة بأهلي وعزوتي وناسي
يا فرحة وطرحة وعروسة ومزمار
شايفك شجرة مفرعة وضلةوهوى
وساقية دايرة تروي بضوء الشمس الخَضار
بساتينك مورقة وبيرقص نخيلك ف العلالي
جناه بشوق مع المحبة أطعم ثمار
أنا ثابت يا بلدي وشاريكي ومش بايعك
وهفديكي بدمي وروحي ودي أقدار
لآجل الوِلد ما يكبروا ويعيشوا في حرية
وبعزة وبكرامة يحكوا كِيف كانوا الكبار
حبك ده قدري مكتوب وبيجري ف وريدي
وريحة نسيمك بعمري اللي جاي وعمري اللي سار
أواعكي تزعلي مني دانا ابنك حبيبك
أنينك أنيني ووجعك واجعني وباستمرار
أنا نبتي من ترابك .. وكان جدي .. واتولد فرعي
أنا مش آلمني غير الطماعين فيكي من الفجار
عايشين في خيرك وواكلينك وهاضمينك
وإذا حاسبناهم يشنعوا بينا ويقولوا الحقوا الغيار
واكلين مال النبي ولا بيخافوا أي حرام
ويحلوا بالمبشرين ومش فارق معاهم نار
جرحني قوي قسوتهم عليكي وجبروتهم
وبجاحة عيونهم المعترفة بلا إنكار
أملي في بكره هايفضل دوايا وغطايا مدفيني
ما انا راضعه من امي لما كنا بنحبي صغار
تعيشي يا بلدي يا نجم عالي في السما
يهدي الحيارى ويطمن كل غايب ويريح المحتار
مصطفى عبدالرحيم الفرا
٢٠٢٢/٧/١٢
ليست هناك تعليقات:
إرسال تعليق