((جنب الحيط ))
وجنب الحيط أنا ماشي
بداري صوتي وانفاسي
ومش عايز
نفسي حتى تسمعني
ضمير خايب بيوجعني
أقول كلمة
تيجي فلتة
تيجي غلطة
تجيب جلطة
لناس أفعالها بتضايق وتتعايق بظلم الناس
وجنب الحيط بيكون مأوى
ما دام الصوت بدون جدوى
وانا وأمثالي
نكون عدوى
بنعدي كتير من البشاوات
لازم للجام لابسين
وحمل كبير بنجره
ولا بسين فى الرجول حدوة
لرنة كعب إلها طنين
عشان نكون ياواد عبرة
وكلامنا تسمعه الملايين
جنب الحيط خليك ماشي
وسيب الحق ولو هيموت
مادام الحق له ناسه
وباب الظلم ترباسة
وعم العدل حالة سكوت
جنب الحيط ع نتخبى
وزي الطفل ندبى
ونصرخ بس من غير صوت
بنستنى فى كام وعد
بنستنى فى أمل بكرة
وعلى فكرة
بكرة فات
بالأمس ومر
وداس أمال
بكر وفر
وانا الغلبان
مازلت قاعد ومستني
وشارب كأس تقول سكران
بنستني فى إمبارح
بنستنى وانا نعسان
فى طين الوعد أنا وحلان
يمكن يرجع بينا الزمان
عووود يازمااان
وتعالى نزرع الحبه
فى أرض الخير
ونرويها ماء إحسان
بلاش للجميل نكران
كلامي دا كلام عاقل
ولا كلام راجل غفلان
بقلمي
نبيل عبد الحليم
٩/٢/٢٠٢٢
ليست هناك تعليقات:
إرسال تعليق