(صعبان علينا )
صعبان علينا
حاجات كتير
بس بغبائنا
مطنشين
أول عباره
تصعب علينا
هى كلمة
(عيش وملح)
الوجع منها كتير
والخداع ما يداوي جرح
أصل عيشنا
كان فطير
والعسل كان
ناقصة ملح
وتاني حاجة
(العشرة على مين تهون)
ودي عبارة
نازلة سلخ
اللي هان عليه أبوه
حبه لأمه حالته وهن
واللي يوم باع اخوه
هو ينفع يبقا أهل ؟
حبل الشهامة قطعوه
والكلام هو اللي سهل
عشرة ايه ياولد أبوه
وعيشنا أصلاً
خالي ملح
باع أبوه عشان مراته
باع أخوه عشان بناته
بدل الأم بحماته
عشان يعيش
سعيد حياته
أصل مش فارق وجوده
حياة جنابه كيف مماته
لسه عايز
م العشره طرح ؟
هانت العشرة
ف دقايق
باع صحابه
والحبايب
ولع فى القلب
حرايق
وجوده أصلا
ماعتش فارق
خلاص تعبنا
فى العشرة شرح
كل طبق
ينضح مافيه
طبق العسل
ما ينضحش ملح
نبيل عبد الحليم
٧/١/٢٠٢١
ليست هناك تعليقات:
إرسال تعليق